Ginpaiway anay sang Department of Transportation (DOTr) kag Land Transportation Office (LTO) ang full implementation sang Republic Act No. 11229 ukon ang Child Safety In Motor Vehicles Act.
Suno sa DOTr, iga-finalize pa nila ang enforcement protocols antes ini ipatuman.
Sa interview sang Bombo Radyo kay LTO-Bacolod head Reuben Tampos, nagahulat pa sila sang guidelines kag implementing rules and regulations (IRR) angot sa pagpatuman sang child car seat sa mga salakyan.
Nahibaluan nga ang Republic Act No. 11229 ukon ang Child Safety In Motor Vehicles Act ang mangin epektibo na sugod subong nga adlaw, Pebrero 2.
Sa idalom sang amo nga layi, ang mga kabataan nga naga-edad 12-anyos panubo ang indi na pwede makapungko sa tupad sang driver.
Kinahanglan na ang mga ini nga maggamit sang child car seats para sa proteksyon.
Suno kay Tampos, maayo gid kun mapatuman ang amo nga layi bangud para man ini sa kaayuhan sang tanan.
Dugang pa sini nga kinahanglan gid ang child car seat bangud indi mapaktan ang mga aksidente.
Suno kay Tampos, dapat gid ini mapatuman indi lamang para sa seguridad kundi para man sa modernisasyon sang mga salakyan bangud naulihi na kita sa iban nga mga pungsod.
