Aminado ang provincial veterinarian sang Negros Occidental nga indi mamierdihan ang mga backyard hograisers sa probinsya pananglitan nga magnubo ang buying price sang mga negosyante sa Metro Manila.
Madumduman nga kahapon nagpagwa sang executive order si Presidente Rodrigo Duterte nga nagapatuman sang 60-day price ceiling sa pork kag chicken products sa Metro Manila.
Sa idalom sang EO No. 124, ang price ceiling para sa kilo sang kasim kag pigue ang yara sa P270, P300 naman para sa kada kilo sang liempo kag P160 para sa kada kilo sang dressed chicken.
Sa interview sang Bombo Radyo Bacolod kay Dr. Renante Decena, ginpahayag sini nga sarang makabaligya ang mga backyard hograisers sa probinsya sang P120-P130 per kilo live weight sang baboy sa Manila bangud nga mas barato ang production cost diri nga nagadangat lamang sa P85-P90 pero kilo.
Suno kay Decena, maka-ginansya gihapon ang mga manugbaboy sang P30-P40 sa kada kilo sang buhi nga baboy.
Dugang pa sini nga pwede man mabaligya ang mga commercial nga baboy sang P150 per kilo live weight.
Gin-athag man sini nga indi lang sa Metro Manila nagasulod ang baboy nagikan sa Negros Occidental.
Suno kay Decena, nagapadala man ang probinsya sang baboy sa Cebu, Leyte, Pangasinan, Tarlac, Bulacan kag Cavite.
Nagasuhestyon man ini nga kuntani pasakaan ang produksyon sang backyard hograisers sa Bacolod agud nga magdugang sa pagpanubo sang presyo sang baboy sa ciudad.
