Magapatigayon ang ciudad sang Bacolod sang simulation exercises ukon dry run para COVID vaccination sa Pebrero 5, sa Barangay Villamonte gymnasium bilang preparasyon sa pag-abot sang bakuna.
Sa interview sang Bombo Radyo kay Emergency Operations Center Deputy for Medical Services Dr. Chris Sorongon, ginpahayag sini nga patigayunon ang dry run sa Biyernes, ala 1:30 sang hapon.
Suno kay Sorongon, ini agud mahibaluan na sang mga pumuluyo kun ano ang pagahimuon kun mangin available na ang COVID vaccines kag magsugod na ang vaccination program kag indi na sila makulbaan.
Tinutuyo man sini nga makapreparar ang ciudad in advance sang logistic support, matumod kun ano ang mga kakulangan, mga dapat iimprove kag mga dapat pabakuron.
Ang vaccination simulation ang pagapamunuan sang City Health Office kaupod ang Maternal, Neonatal and Child Health and Nutrition Division chief, nga magasupervise sa CHO personnel.
Sini ang iga-assist sang EPI Medical kag Nurse Coordinators, HEMS, Health Education and Promotion Officer, Barangay Health Workers kag Barangay Health Emergency Response Team.
Magapakigbahin man ang City Disaster Risk Reduction Management Office (CDRRMO) sa nasambit nga aktibidad.
