Magapatigayon sang zoom meeting si Governor Eugenio Jose “Bong” Lacson kaupod ang mga alkalde sang kada banwa kag ciudad sang Negros Occidental subong nga adlaw agud hibaluon kun may plano ang mga ini nga magbakal sang COVID accine.
Suno kay Lacson, luyag sini mahibaluan kun may mga local government unit nga handa magbakal sang vaccine.
Madumduman nga nakaperma na sang agreement ang probinsya sa AstraZeneca nga magabakal ini sang vaccine apang nagalaom ang gobernador nga sarang ini nga ma-redo kag malakip ang mga LGUs kag private sector nga luyag magbakal.
Samtang, nagpain na sang P30 million nga pondo ang Cadiz City para sa pagbakal sang bakuna batok sa COVID-19.
Sa interview sang Bombo Radyo kay Cadiz City Mayor Salvador Escalante, ginpahayag sini nga ang ila budget sini nga tuig 2021 ang ginreenact lang sa nagligad nga tuig apang may yara sang kapin P100 million nga wala sang actual nga galastuhan.
Suno kay Escalante, ini ang para sa sa COVID-19 response kun sa diin P30 million ang gintigana para sa pagbakal sang bakuna.
Magluwas diri, may yara pa sang budget sang 2020 para sa mga travel kag seminar apang bangud nga indi ini mausar tuga sang pandemic, sarang ini nga magamit para sa COVID-19 response.
Suno sa iya, nagpasa naman ini sang intent sa League of Cities agud makapasakop bakal sang bakuna.
