Patay ang isa ka pulis sa banwa sang Mabinay, Negros Oriental matapos gintiro sang unidentified riding-in-tandem suspects sa Barangay Lumbangan, Mabinay sang Lunes sang hapon.
Sa impormasyon nga nakuha sang Bombo Radyo, nagikan sa balay ni Barangay Councilor Tobias Villarejo ang biktima nga si Jeseden Carriaga, 54 anyos, residente sang Barangay Interior Cabugan, Bindoy, Negros Occidental para sa settlement agreement bangud may utang ini sa iya.
Sang manugsakay na sa iya nga motor si Carriaga, nagikan sa likod nga direksyon, hinali lang nga may naglabay nga riding-in-tandem kag ginluthang ini sang backrider.
Nakaangkon siya sang igo sa ulo nga gintunaan sang iya kamatayon.
Nakuha sa crime scene ang lima ka cartridges sang .45 caliber pistol.
Sa karun nagapadayon pa ang imbestigasyon sang kapulisan tuhoy sa motibo sang krimen.
