Nagpirmahanay sang memorandum of understanding ang mga opisyales sang Negros Occidental Police Provincial Office kag Bacolod Queen of Mercy Hospital angot sa paghatag sang discount sa mga pulis nga magapabulong sa amo nga balay-bululngan.
Sa interview sang Bombo Radyo kay NocPPO deputy spokesperson Police Lt. Abegail Donasco, ginpirmahan sang Lunes ang MOU sa pagpanguna ni Police Col. Romeo Palgue.
Sa idalom sang MOU, ang mga miyembro sang NocPPO kag ila dependents kalakip na ang mga retirees ang may yara sang pribiliheyo nga maadmit nga wala sang initial deposit.
Sa tion nga sila ang maadmit sa BQMH, maka-avail sila sang 10 porsyento nga discount samtang 15 porsyento naman kun out patient.
Ang mga retired members naman kag mga senior citizens ang maka-avail sang 23 porsyento nga discount.
Agud nga maka-avail sang discount suno kay Donasco, magapresentar lang ang pulis ukon retiree sang PNP ID kag letter of authority nagikan sa NOCPPO nga pirmado sang provincial director.
Ginakalipay naman sang NOCPPO ang pribiliheyo nga ginatanyag sang nasambit nga ospital bilang pagpasalamat nila sa serbisyo sang mga kapulisan.
