Magluwas sa pagpanghold-up, isa sa mga anggulo nga ginalantaw sang kapulisan sa pagtiro-patay sa isa ka 23 anyos nga babaye sa sulod sang iya salakyan sa Barangay Tangub, Bacolod City kahapon amo ang love triangle.
Sa interview sang Bombo Radyo kay Police Major Joery Puerto, hepe sang Bacolod Police Station 8, ginpahayag sini nga yara sa atubang sang Medical Plaza sa BS Aquino Drive pasado alas-7:00 sang aga ang biktima nga si Angelica Montalvo, 23 anyos kaupod ang iya live-in partner nga amu ang nagadrive sang salakyan nga si Mark Carson Epsilon, 40 anyos, kag ang iya tiya kag pakaisa nga babaye sang hinali lang nga may nagpalapit nag lalaki nga nakamask kag nadeklarar sang hold-up.
Nagsulod ini sa salakyan, kag ginhambalan nga padalaganon ang salakyan bangud sila ang magapadulong sa Barangay Cabug.
Suno sa pahayag ni Epsilon, ginhatag sini ang tanan nila nga kwarta kag mga cellphone kag samtang nagaandar ang salakyan, nagpalupok pa sang pusil ang suspetsado.
Paglab-ot sa Oroland, liwat nga nagpalupok ini kag nagwa sa salakyan kag nagpadulong sa nagahulat nga motorsiklo nga nagasunod sa ila humalin pa lang sa BS Aquino Drive.
Pagwa sang suspetsado, didto nalang nila nakit-an nga may natiruhan sa ulo si Montalvo kag ini ang ginhingagaw pa dala sa Bacolod Adventist Medical Center apang wala na natabangan.
Suno kay Puerto, wala sang may nakuha nga empty shell sa salakyan apang natukiban nga revolver ang gingamit sang suspetsado.
Magluwas sa pagpangawat, suno sa hepe, ila ginalantaw nga motibo amo ang love triangle bangud ang live in partner sini nga si Epsilon ang bulag sa asawa duha ka tuig na ang nakaligad kag may duha ka mga kabataan.
Gindugang man sini nga ang father-in-law ni Epsilon ang kilala sa ciudad sang Bacolod.
Sa karun nagapadayon pa ang imbestigasyon sang kapulisan.
