Ginapadalman pa sang Bacolod City Police Station 8 ang imbestigasyon sa natabo nga pagpanghold-up sa sulod mismo sang salakyan sa Barangay Tangub, Bacolod City kahapon nga nagresulta kamatayon sang isa ka babayi.
Sa interview sang Bombo Radyo kay Police Major Joery Puerto, station commander sang Bacolod City Police Station 8, ginpahayag sini nga nakahatag na sang statement ang pamilya sang biktima nga si Angelica Montalvo, 23 anyos, sang Purok Lison, Barangay Banago, matapos nga sila mismo ang nagpadulong sa ospital kahapon.
Suno diri, ginapadalman pa ang imbestigasyon bangud kun hold up lamang ang tuyo sang suspetsado, nanaog na ini sang iya nakuha ang luyag niya kuhaon.
Mahimo suno sa station commander nga may iban pa nga agenda ang suspetsado bangud nagpadrive pa ini padulong sa Barangay Cabug.
Madumduman nga kahapon ginpahayag ni Mark Carson Epsilon, 40 anyos nga nagsulod ang holduper sa salakyan sang sila ang nagapundo sa BS Aquino Drive kun sa diin mapakonsulta si Montalvo kag ginhambalan nga padalaganon ang salakyan bangud sila ang magapadulong sa Barangay Cabug.
Suno sa pahayag ni Epsilon, ginhatag sini ang tanan nila nga kwarta kag mga cellphone kag samtang nagaandar ang salakyan, nagpalupok pa sang pusil ang suspetsado.
Pag-abot sa Oroland, liwat nga nagpalupok ini kag naggwa sa salakyan kag nagpadulong sa nagahulat nga motorsiklo nga nagasunod sa ila humalin pa lang sa BS Aquino Drive.
Paggwa sang suspetsado, didto nalang nila nakit-an nga natiruhan sa ulo si Montalvo kag ini ang ginhingagaw pa dala sa Bacolod Adventist Medical Center apang wala na natabangan.
