Nagapati ang pinuno sang Environmental Management Bureau (EMB)-Negros Occidental nga ang information campaign ang dapat nga pasanyugon sa plano nga pagdumili sang plastic straw kag plastic coffee stirrers kasunod sang pag-aprubar sang National Solid Waste Management Commission sang draft resolution nga nagalakip sa duha ka mga items sa listahan sang non-environmentally approved products.
Sa interview sang Bombo Radyo Bacolod kay Paul Orosio, pinuno sang EMB-Negros Occidental, ginpahayag sini nga dapat pasanyugon ang information drive pananglitan nga madayon ang plano nga pag-ban sa plastic straws kag plastic coffee stirrers agud nga makahibalo ang mga pumuluyo.
Suno sa iya, madamo naman sang mga establisyemento ang wala nagagamit sang plastic straw halin pa sadto.
Apang dapat nga pasanyugon pa gid ang information campaign agud nga mahibaluan sang tanan nga ginadumili na gid ang paggamit sini.
Suno kay Orosio, pananglitan nga mapatuman ini, mabuhinan gid ang mga plastic nga basura nga nagatuga sang pagbaha kada mag-ulan.
Nagapanugyan man ini sa tanan nga apisar wala pa naaprubahan ang pag-ban, kuntani likawan na ang paggamit sang plastic.
