Isa ang patay kag isa ang pilason sa shooting incident nga nagluntad sa Reclamation Area, Barangay 2, Bacolod City pasado alas 9:00 kagab-i.
Sa impormasyon nga nakuha sang Bombo Radyo, nadulaan sang kabuhi si Salvador Regalado alyas Badong, residente sang nasambit nga lugar matapos ginpaarakan sang luthang sang ginaalegar riding-in-tandem suspects.
Nagatindog ini sa sagwa sang isa ka kalan-an kaupod ang iban pa nga mga driver sang nagaparada nga wingvan sang naglabay ang isa ka motorsiklo sakay ang duha ka mga suspetsado kag hinali lang nga nagpangluthang.
Nagdalagan ini pakadto sa hilamunan apang ginlagas gihapon sang luthang sang mga suspetsado.
Ginaalegar nga may kaangtanan sa illegal nga druga si Regalado apang gina-imbestigahan pa ini sang kapulisan.
Samtang, nagwa sa isa ka kalan-an si Glomer Paampag, 40 anyos, driver sang wing van kag residente sang Passi City, Iloilo, apang suno sa mga kaupod sini, nagbalik na ini nga duguan.
Suno sa ila, pagwa ni Paampag sa kalan-an, may nabatian sila nga lupok kag nakit-an nga nagadalagan pabalik ang biktima kag pilason na ini.
Nakaangkon ini sang pilas sa nawala nga tiyan kag padayon pa nga ginabulong sa ospital.
Sa karun, nagapadayon pa ang imbestigasyon tuhoy sa motibo sang krimen.
