Presyo sang bulak sa Bacolod, ginalantaw nga magasaka sa Valentine’s Day

Ginalantaw sang mga flower vendors sa ciudad sang Bacolod nga mahimo magsaka pa ang presyo sang bulak antes ang Valentine’s Day sa Pebrero 14.

Sa interview sang Bombo Radyo kay Maritess Reguado, P50 ang bili sang kada stick sang rose sa karon samtang P40 naman ang kada stick sang Malaysian mums.

Ang isa naman ka dosena nga rose nga ginhimo nga bouquet ang nagabili sang P1, 000.

Sa karon suno kay Reguado, wala pa sang pagbag-o sa presyo kag wala pa man sang dako nga demand, apang mahimo suno sa iya nga magsaka pa ang presyo kun malapit nalang ang Valentine’s Day ukon sa adlaw mismo sang paghigugma.

Ang supply nanday Reguado ang ginakuha pa sa Cebu kag Manila.