Ginkumpirmar sang tagpamaba sang Bacolod City Police Office (BCPO) nga nakuhaan sang isa ka sachet sang suspected shabu ang napatay sa shooting incident nga nagluntad sa Purok Lampirong Reclamation Area, Barangay 2, Bacolod City pasado alas 9:00 kagab-i.
Madumduman nga nagatindog ang biktima nga si Salvador Regalado alyas Badong residente sang nasambit nga lugar sa sagwa sang isa ka kalan-an kaupod ang iban pa nga mga driver sang nagaparada nga wingvan sang naglabay ang isa ka motorsiklo sakay ang duha ka mga suspetsado kag hinali lang nga nagpangluthang.
Nagdalagan ini pakadto sa hilamunan apang ginlagas gihapon sang luthang sang mga suspetsado kun sa diin gintunaan sang iya kamatayon.
Samtang, nagwa sa isa ka kalan-an si Glomer Paampag, 40 anyos, driver sang wing van kag residente sang Passi City, Iloilo, apang suno sa mga kaupod sini, nagbalik na ini nga duguon.
Nakaangkon ini sang pilas sa nawala nga tiyan kag padayon pa nga ginabulong sa ospital.
Sa interview sang Bombo Radyo Bacolod kay P/Lt. Ma. Liberty Indiape, ginpahayag sini nga nakuha sang nurse nga nag-atinder kay Regalado sa ospital ang isa ka sachet sang suspected shabu sa bulsa sang biktima.
Suno kay Indiape, wala nila ginadula ang posibilidad nga iligal nga druga ang motibo sa pagpangluthang sa biktima.
Sa karon nagapadayon pa ang ila imbestigasyon sa insidente agud mapat-od gid ang motibo sa pagpatay kay Regalado.
