Nagpanugyan ang Securities and Exchange Commission (SEC)-Bacolod City sa mga team leaders sang RGS World Marketing Corporation nga ipaathag sang husto sa ila mga miyembro kun ano ang nature sang ila negosyo.
Sa interview sang Bombo Radyo Bacolod kay Atty. Annabelle Corral-Respall, officer-in-charge sang SEC-Bacolod, ginpanindugan sini nga lain ang ginpaathag nga nature sang negosyo sang RGS World Marketing Corporation nga nakarehistro sa SEC sangsa klase sang aktibidad nga ginareklamo karon sang mga ginapatihan nag-invest sa ila.
Suno kay Respall, ang ginpresentar sang taga-RGS World Marketing Corporation sa ila amo nga isa sila ka multi-level marketing kun sa diin nga dapat mapuno ang board matrix sang kada team agud nga makabaton sila sang incentive bonus.
Nahibaluan nga sa gin-invest nga P1,000 makabaton ini sang P3,500 nga incentive bonus kag sa nag-invest sang P5,000 makabaton naman ini sang P17,500.
Ginpaathag man sa ila sang korporasyon nga sa P1,000 nga ibayad sang isa ka tawo, makabaton ini sang apat ka bars sang habon nga diskwentado kag sarang nila ini mabaligya sa presyo nga P250.
Apang, ginalibugan karon sang SEC amo kun ngaa madamo sila sang nagakabaton nga reklamo nga lain ang ginahimo nga aktibidad sang RGS World Marketing Corporation sangsa nature of work nga nakarehistro sa talatapan.
Suno kay Respall, obligasyon kuntani sang mga team leaders sang RGS World Marketing Corporation nga ipaathag sang husto sa ila mga miyembro kun ano ang dalagan sang negosyo sang amo nga korporasyon.
Samtang, may penalidad nga paga-atubangon ang RGS World Marketing Corporation kun mapamatud-an nga naglapas ini sa layi.
Una diri, madamo sang nagreklamo sa Bombo Radyo Bacolod nga wala pa sila nakabaton sang payout nagikan sa ila gin-invest nga P1,000 nga ginpromisahan nga makabaton sang P3,500 kag nag-invest sang P5,000 nga makabaton sang P17,500.
Sa interview sang Bombo Radyo Bacolod kay Atty. Annabelle Corral-Respall, officer-in-charge sang SEC-Bacolod, ginpahayag sini nga nagabase sila sa Revised Penal Code.
Pananglitan nga mapamatud-an nga naglapas sa layi ang amo nga korporasyon, magapangatubang sila sa penalidad.
Suno kay Respall, ini ang ginalakipan sang monetary penalty, advisory, cease and desist order, suspension, revocation kag ang pinakalala amo ang pag-file sang criminal kag civil cases in violation of the securities regulation code.
Apang gin-athag sini nga wala sila nagapadaso-daso sa pagdagdag sang penalidad kundi ila ini gina-imbestigaran sang husto kag ginamonitor kun may yara sang magpadangat sa ila sang reklamo.
Suno sa iya, nagapatawag sila sang clarificatory conference ukon nagapadala sang show cause order agud nga mapasabat man ang natungdan.
Nagpasalig si Respall nga himuon gid nila ang tanan agud nga mapat-od kun ano gid man ang dalagan sang negosyo sang RGS World Marketing Corporation.
