Nagpagwa si Bacolod City Mayor Evelio “Bing” Leonradia sang Executive Order No. 4 series of 2021 kagab-i nga nagasuspende sa public celebration sang Bacolaodiat Festival kag tanan nga mga aktibidad may kaangtanan sa Chinese New Year subong nga Pebrero.
Ini agud nga maseguro ang pag-obserbar kag pagsunod sa health kag safety protocols agud nga matapna ang paglapta sang COVID-19 infection.
Nahibaluan nga tuigan na nga ginahiwat ang Bacolaodiat Festival sa ciudad sang Bacolod kadungan sang pagselebrar sang Chinese New Year sa pag-abot sang Pebrero 12.
Kalakip sa ginadumilian ang pagpatigayon sang parade, exhibits, road shows, bisan ano nga contest sa mga dalanon ukon sa bisan diin nga pampubliko nga lugar, concert, sport events, open market fairs ukon industrial/commercial fairs sa Pebrero 12 ukon sa bisan ano nga petsa sa bulan sang Pebrero.
Indi man maghatag sang business permits ukon license to operate para sa bisan ano nga aktibidad may kaangtanan sa selebrasyon ang Business Permits and Licensing Office.
Kasubong man nga igakanselar ang mga permits nga nahatag na para sa nasambit nga petsa.
