Nagpanindugan ang punong barangay sang Barangay Tangub, Bacolod City nga kun may mga anomaliya, ang mga kagawad ang dapat basulon bangud sila ang nagatsekyar kag naga-aprubar sang mga resolusyon nga ginaimplementar.
Madumduman nga sang Miyerkules, ginpakigbahin ni Kagawad Joan Sonota ang ila nga reklamo tuhoy sa ginaalegar anomaliya sa mga job order employees sang barangay.
Suno sa iya, sang nagsugod sila himo sang budget appropriation para sa 2021, may ginpermahan sila nga plantilya nga nalakip ang pangalan sang mga empleyado.
Sang ila ginlantaw ang dokumento, may mga nalakip sa lista nga sang 2019 pa nagtaliwan gani sila ang natingala.
May nagagwa man nga indi pareho ang balor sang ginapermahan sang mga empleyado sa balor nga ila nagakabaton.
Sa interview sang Bombo Radyo kay Punong Barangay Noli Villarosa nga sa karun yara pa sa idalum sang suspension kag natalana nga mabalik sa Marso, ginpahayag sini nga ang tuhoy sa job order ang ginapresentar sa kada session kag ginadala sa approval.
Suno sa iya, ang committee on finance ang maaprubar sini kag ang mga kagawad bangud ang punong barangay amu ang nagatindog bilang presiding officer lamang.
Gani kun may mga anomaliya, sila ang dapat basulon bangud wala nila ginaisa-isa tsekyar ang mga detalye kag ila ini kapalpakan.
Gin-athag man sini nga apisar nga nalakip ang pangalan sang napatay sa listahan, indi na ini magbaton sang kwarta bangud ginaislan ini sang lain naman nga empleyado nga makaubra sang trabaho.
Ginpanginwala man sang punong barangay nga lain ang nagakabaton nga balor sang mga job order employees sang sa ila ginpermahan kag kun may mga anomaliya man, dapat ang mga pumuluyo ang magareklamo kag indi ang iya kaangay nga mga opisyal.
Suno kay Villarosa, ang barangay treasurer kag committee on finance ang nakahibalo sang mga butang nahanungod sa kwarta kag wala diri kaangtanan ang punong barangay.
Suno diri, indi makapagwa sang maskin sintimos ang isa ka kapitan kun wala sang pahanugot sang mga kagawad.
Nagpanghangkat man ini nga imbestigaran siya humalin sang ini ang nagpungko sang 2013 agud makit-an kun may ginahimo gid man ini nga anomaliya bangud suno kay Villarosa, kun may malain ini nga gina-ubra, indi na ini kuntani ma-elect pa sa iya ikaduha nga term bilang pinuno sang Barangay Tangub.
Nagapati si Punong Barangay Noli Villarosa sang Barangay Tangub nga mission sang barangay ang magbulig sa mga pumuluyo ilabi na sa karun nga may pandemic rason kun ngaa iya ginpahanugutan nga mag-angot sang kuryente kag tubig ang mga manugbaligya sa barangay.
Madumduman nag sang Miyerkules, ginpadangat ni Kagawad Joan Sonotasa City Legal’s Office ang ila reklamo tuhoy sa illegal nga pag-angot sang kuryente sa ila nga barangay sang pila ka mga balaligyaan.
Sa interview sang Bombo Radyo kay Villarosa, ginpahayag sini nga matuod ina kag temporaryo lang ang mga ini nga nagabaligya bangud sa pandemic.
Suno sa iya, kun ila ini sukton, makaluluoy lang ang mga pumuluyo.
Ginpahayag man sini nga wala sang ordinansa sa barangay nga indi sila pwede makabaligya ukon makaangot sang tubig kag kuryente ang mga pumuluyo gani indi siya makapanghindi sa mga ini.
Suno sa iya, ang mga nahamtang sa kilid sang gym ang isa kuntani ka livelihood project nga income generating apang ang mga kagawad man ang nagakontra diri kag na-hang ang nasambit nga proyekto bangud siya man ang nasuspende.
Suno kay Villarosa, indi makapatuga-tuga nga indi maghatag sang tubig kag kuryente sa mga pumuluyo kag kun wala man lang sang layi nga nagadumili diri, siya ang handa gid nga magbulig.
