Aminado ang chairman sang mga flower vendors sa likod sang BAYS Center nga 50 porsyento gid ang ila nangin kapierdihan subong nga Valentine’s Day bangud sa mga online sellers.
Sa interview sang Bombo Radyo Bacolod kay Glen Amar, ginpahayag sini nga apektado gid kaayo ang ila nga baligyaanay subong bangud sa mga nagabaligya online bangud nga direkta nga naga-order sa ila ang mga kustomer samtang sila naman ang naga-retail lang kag masami mga suki ang nagakadto gid kag nagabakal.
Nagbuhin naman sila sang order sang suplay sang bulak halin Bagiuo kag Cebu bangud nga tuman ka mahal sang presyo sang mga bulak.
Suno sa iya, madamo gid subong ang mas nagaprefer sa online bangud nga mas mahapos ini ilabi na nga may pandemya.
Samtang, kalabanan naman nga nagabakal sa ila subong amo ang may mga asawa.
Dako naman ang nabuhin nila nga customer sa karon bangud nga wala sang klase.
Suno kay Amar, kalabanan sadto nga nagabakal amo ang mga estudyante.
Sa pinakaulihi nga pagtsekyar sang Bombo News Team, ang isa ka boquet sang rose nga may tatlo ka stem ang nagabalor sang P300 samtang ang isa naman ka dosena ang may presyo nga P1,200.
