Padayon pa ang imbestigasyon sang San Enrique Municipal Police Station sa identity sang suspetsado nga nagsulod sa kwarto sa isa ka resort sa Barangay Tibsok banwa sang San Enrique, Negros Occidental kag nagtiro-patay sa 33-anyos nga biktima sang Pebrero 13.
Sa interview sang Bombo Radyo Bacolod kay Police Major Renante Salgado, hepe sang San Enrique Municipal Police Station, ang biktima ang ginkilala kay Ryan Villanueva, 33 anyos, single kag residente sang Brgy. 1, La Carlota City.
Suno kay Salgado, nagtawag sa ila ang upod sang biktima agud pahibaluon sa natabo.
Nakaangkon sang 28 ka mga igo sang bala sa lawas ang biktima halin sa ginapatihan 9mm kag 45 caliber pistol.
Alas 2:45 sang kaagahon sang Pebrero 13 samtang nagakaon sa sulod sang kwarto ang biktima upod ang 25 anyos nga babaye, gulpi lang nagsulod ang armado nga mga tawo, ginpagwa ang babaye kag ginpahapa ang lalaki sa sulod sang kwarto kag ginluthang.
Narekober sang mga kapulisan sa bulsa sang biktima ang isa ka improvised tooter, isa ka empty transparent sachet sang suspected shabu, kag isa ka plastic sachet sang suspected marijuana seeds kag leaves.
Suno kay Salgado, ila pa ginausisa ang report angot sa pagkalakip sa ngalan sang biktima sa drug watchlist sa syudad sang La Carlota.
Ginpahayag man ni Salgado nga wala nakilala sang partner sang biktima ang mga suspetsado bangud ginpagwa ini kag ginabanta man sini nga lima ka mga tawo ang nagpatay sa biktima.
Sa karun ginaimbestigaran nang duha ka lalaki kag isa pa ka babaye nga gin-imbetar sang biktima sa iya birthday party kag nag-overnight man sa pihak nga kwarto.
Suno pa sa hepe, mahimo nga natulugan ang gwardiya gani nakasulod ang mga suspetsado.
Icheck man nila ang CCTV camera sa lugar kun functional agud nga makabulig sa imbestigasyon.
Wala man sang rekord ang biktima sa San Enrique Police Station.
