Ginpanindugan sang pinuno sang Bacolod City Police Office nga wala sila nagapabaya sa imbestigasyon may kaangtanan sa serye sang patyanay sa ciudad sang Bacolod kun sa diin ang pinakaulihi amo sanday Dexter Brian Ursos kag Fernando Mahipus nga gintiro sa sulod mismo sang awto sa Purok Lampirong, Barangay 2 sang Miyerkules sang gab-i.
Ini ang kasunod sang pahayag sang Police Regional Office 6 nga lantawon sang oversight committee ang serye sang shooting incidents sa ciudad sang Bacolod.
Sa interview sang Bombo Radyo kay Police Col. Manuel Placido, ginalantaw sang imbestigador kun ano ang transaction nanday Ursos kag Mahipus sa lugar nga wala sang suga kag kadamol pa sang pagbubo sang ulan.
Nahibaluan nga nakarekober ang mga pulis sang shabu, drug paraphernalia kag peke nga kwarta sa sulod sang Mitsubishi Mirage nga ginasakyan sang duha ka mga biktima.
Suno diri, wala sang patyanay sa ciudad sang Bacolod kundi may yara sang gintiro.
Aminado ini nga naangot sa illegal drugs ang iban nga mga biktima kaangay sang gintiro sa Barangay 38 apang nagapati gihapon ang city director nga wala sila dapat ginpatay.
Kun indi man masolbar ang mga krimen subong suno kay Placido, mahimo nga masolbar ini sa masunod nga inadlaw.
Iya man ginpanginwala nga murder capital ang Bacolod bangud mas madamo ang patyanay sa lugar sa diin siya naghalin antes gin-assign sa Bacolod.
Suno diri, indi dapat matabo ang kaangay sini nga insidente apang indi man niya mapunggan ang mga suspetsado.
