Positibo ang reaksyon sang Negros Occidental Police Provincial Office sa ginaplano ni PNP Chief Gen. Guillermo Eleazar nga magpatigayon sang regular nga psychiatric assessment ukon exam matapos ang nagluntad nga pagluthang-patay ni Police Master Sergeant Hensie Zinampan sa 52-anyos nga si Lilibeth Valdez sa Quezon City.
Sa interview sang Bombo Radyo kay NOCPPO deputy spokesperson Police Lt. Abegael Donasco, ginpahayag sini nga maayo ini para sa overall being sang mga personnel kag positibo gid ang ila response diri.
Suno kay Donasco, kun kaisa, may mga balatyagon nga wala nagakapagwa ilabi na sa nature sang ila trabaho gani makabulig gid ang regular nga psychiatric assessment.
Gindugang man sini nga nalakip lang ang ini nga aktibidad sa screening antes paman makasulod sa PNP ukon antes mangin officer.
Apisar sini, aminado ang tagpamaba nga indi pa sa karun feasible nga ini ang mapatigayunan regularly ukon kada bulan bangud indi masarangan sang ila pondo ang macater tanan nga kapulisan.
Nagapati ini nga sarang ini nga amat-aat nga mahimo kaangay sang isa ka beses kada tuig ukon duha ka beses sa isa ka tuig. Samtang, una na nga ginaabi-abi sang Bacolod City Police Office ang plano nga regular nga ipaidalom sa neuropsychiatric tests sang mga katapo sang Philippine National Police.
Tinalikdan nga adlaw, ginpahayag ni PNP chief Police General Guillermo Elezar nga ginakonsiderar niya ang pagpatigayon sang neuropsychiatric tests sa mga pulis kada tatlo ka tuig bilang kabahin sang tikang agud nga mamonitor ang ila nga mental kag emotional stability.
Nahibaluan nga sa karon, sa recruitment process lang ang neuropsychiatric test sang PNP.
Ang proposal suno kay Eleazar ang ginbase man sa re-enlistment process sang Armed Forces of the Philippines kun sa diin required sila nga magpaidalom sa neuropsychiatric test kada tatlo ka tuig.
Madumduman nga nabutang sa kontrobersiya ang pila ka miyembro sang PNP matapos gintiro ni Police Master Sgt. Hensie Zinampan ang 52-anyos nga tupad-balay nga babayi nga si Lilybeth Valdez sa liog nga nagresulta sa iya nga kamatayon.
Suno kay BCPO spokesperson Police Major Sherlock Gabana, maayo ang tikang sang PNP chief.
Aminado ini nga kun kaisa, apektado ang pulis bangud stressed ini sa trabaho kag sa panimalay.
Wala man sang regular nga stress management nga ginahatag sa PNP.
Kun may regular nga neuropsychiatric test suno kay Gabana, macheck gid kun healthy ang personnel psychologically kag indi lang physically.
Mas maayo man suno sa iya kun PNP ang magasabat sang bayad sang NP test bangud makatipid sila sa gasto kag magamit pa sang ila pamilya.
