Padayun pa ang pagpangita sa lima ka tuig nga bata nga babayi ang gin-anod sang makusog nga daludo sang tubig sa suba ciudad sang La Carlota kahapon.
Suno kay P/Lt. Col. Jonel Guadalupe, hepe sang La Carlota City Police Station, may nabatun sila nga report nga may nalunod nga bata sa Purok 6, Barangay La Granja, La Carlota City takna alas-4:00 sang hapon.
Nakumpirmar naman nila ini kaupod ang La Carlota City Disaster Risk Reduction Management Office personnel nga nagpatigayon sang rescue operation.
Suno kay Guadalupe, magatabok kuntani sa suba ang iloy kaupod sang duha sini ka kabataan nga naga-edad lima kag duha ka tuig agud nga magpakaon sang mga hinuptan nga manok kag mga baboy.
Una nga gintabok sang iloy ang lima ka tuig nga bata nga babayi, kag temporaryo nga gintungtong ini sa isa ka bato sa kilid sang suba bangod pagabalikan pa sini ang duha ka tuig nga bata.
Sang makadangat sa duha ka tuig nga bata, hinali naman nagdalom ang tubig sa suba dala sang makusog nga daludo sang tubig gikan sa bukid.
Ginalantaw nga tuga ini sang pag-ulan-ulan kahapon.
Gin-anod sang tubig ang lima ka tuig nga bata kag nabudlayan man ang mga rescuers sa pagpangita diri bangod sa mabaskog nga tubig.
Suno kay Guadalupe, nakabaton ini sang impormasyon nga nakita na nila kuntani ang bata apang wala makuha bangod sa mabaskog nga ilig sang tubig nga naghatag sang kabudlayan sang mga local DRRM officers.
Temporaryo naman nga ginpauntat ang search operation sang magdulom na, kag pagapadayunon ini subong nga adlaw.
