137 ang panibag-o nga nagdugang sa kaso sang COVID-19 sa probinsya sang Negros Occidental kahapon samtang 128 naman ang nagdugang nga kaso sa sa syudad sang Bacolod.
Sa COVID-19 Regional Case Bulletin No. 436 nga ginpagwa sang Department of Health Center for Health Development-Western Visayas, nadugangan sang 764 ang kaso sa Region 6.
Sa nasambit nga numero 70 diri ang nagikan sa Aklan; 33 sa Antique; 66 sa Capiz; tatlo sa Guimaras; 211 sa Iloilo; 137 sa Negros Occidental; 128 sa Bacolod City kag 116 ang nadugang sa Iloilo City.
Bangud diri, nagdangat na sa 50, 948 ang kabug-usan nga kaso sang COVID-19 sa Western Visayas kun sa diin nadugangan sang 293 ang mga nag-alayo sa balatian gani yara na ang kabug-usan nga recoveries sa 40,786 samtang nagdangat naman sa 1,205 ang death toll matapos madugangan sang 10 ka nagtaliwan bangod sa virus.
Ang 136 nga mga nadugang nga kaso sang COVID-19 sa probinsya sang Negros Occidental ang mga local cases kag ang isa locally stranded individual (LSI), samtang sa 128 nga nadugang nga kaso sang Bacolod City ang lunsay local cases.
Nagdangat na sa 10,300 ang kabug-usan nga kaso sang COVID-19 sa Bacolod kun sa diin 1,473 ang aktibo; 8,560 ang nag-alayo kag nagdangat sa 26 ang nagtaliwan.
Samtang yara naman sa 15,678 ang kabug-usan nga kaso sang COVID-19 sa Negros Occidental kun sa diin 2,068 ang aktibo; 13,311 ang nag-alayo kag nagdangat na sa 291 ang death toll.
