Nagdangat sa masobra P5 million ang balor sang halit nga ginbilin sang Bagyong Dante sa humayan sa pila ka bahin sa probinsya sang Negros Occidental.
Sa interview sang Bombo Radyo Bacolod kay Negros Occidental Provincial Agriculturist Atty. Japhet Masculino, nagapadayon ang ila nga damage assessment apang sa inisyal nga datos, anum ka mga local government units (LGUs) ang nakareport sang halit nga ginbilin sang nasambit nga bagyo.
Ini ang ginalakipan sang syudad sang Cadiz sa District 2; syudad sang Victorias sa District 3; banwa sang Pontevedra sa District 4; sa District 5 naman banwa sang Binalbagan kag Moises Padilla samtang sa District 6 ang banwa sang Hinoba-an kun sa diin tuman nga nahalitan.
Sa report sang banwa sang Hinobaan sa OPA nagdangat sa masobra P2 million ang natuga nga halit sang bagyo sa banwa.
Nanasari-sari nga stages sang humay ang nahalitan sang bagyo, may yara sang mature, reproductive kag maturity stage ang mga rice crops.
Kabug-usan nga 208 ka mga mangunguma ang apektado sa anom ka mga LGU kun sa diin 240 ka ektariya sang duta kag 28 ka mga barangay ang nahalitan bangud sa pagbaha.
