Nagpanawagan ang provincial agriculturist sang Negros Occidental sa mga mangunguma nga ipa-insure ang humayan agud nga may mabaton sa tion nga mahalitan sang kalamidad.
Suno kay Atty. Japhet Masculino, naga-amat amat na sab-og sang binhi sang humay ang mga mangunguma bangud subong nagaumpisa na ang first cropping.
Suno kay Masculino, nag-umpisa naman ang irigasyon sang syudad sang Bago sang Mayo.
Madamo naman ang nagapreparar na sa pagtanum sang humay bangud nag-umpisa na ang tig-ululan, kasubong man sa dala nga ulan ni bagyo Dante.
Suno diri, kun nakarehistro ang humayan makakuha ini sang insurance nagikan sa Philippine Crop Insurance Corporation, nga amo ang principal agency nga nagahatag sang insurance sa mga humayan nga nahalitan sang kalamidad.
Ginaschedule naman sang PCIC ang pagpanagtag sang indemnity checks sa mga mangunguma.
Nagpanawagan man si Masculino sa mga mangunguma nga makig-angot sa ila city kag municipal agriculture’s office agud nga magparehistro sa Registry System For Basic Sectors In Agriculture (RSBSA), agud nga makabaton sang tanan nga agricultural programs sang gobyerno.
Pasalig naman sini nga wala sang bayad ang pagparehistro sa insurance.
