Wala sang nakita nga problema ang tagpamaba sang Negros Occidental Police Provincial Office (NOCPPO) sa ginlunsyar ni Philippine National Police (PNP) Chief Police General Guillermo Eleazar nga pagsuksok sang body cameras sa tion sang police operations.
Sang Biyernes, madumduman nga ginlunsyar ni PNP Chief General Eleazar ang body worn cameras.
Nagalaom ang PNP nga ang programa ang mangin palaagyan agud mabuhinan ang pagpang-abuso sang pila ka mga police officers sa ground.
Ginpahayag ni Eleazar nga ang polisa ang tribute sa 17 anyos nga si Kian Delos Santos.
Tatlo ka mga police officers ang nagpatay sa teenager sa tion sang anti-drug operation sa Caloocan City sadtong 2017.
Ginpahayag man sang tatlo ka police nga nagpamalibad si Kian sa pag-aresto sa iya, apang baliskad ang ginpakita sang security camera malapit sa lugar.
Ginmantsahan naman ang imahen sang PNP sang extrajudicial killings kag mga aligasyon sang pagtanum sang ebidensya.
Suno kay Eleazar ang camera ang magamit man agud nga maproteksyuanan ang mga kapulisan batok sa indi patas nga mga aligasyon.
Sa interview sang Bombo Radyo Bacolod kay Police Lt. Abegael Donasco, ginakalipay nila ang pagbakal sang PNP sang body cameras kag ini ang magamit sa police operations sa probinsya sang Negros Occidental.
Suno kay Donasco, ipaidalom sa training ang mga police personnel nga magagamit sang body cameras.
Ginpahayag man ni Donasco nga gamiton ang body cameras para sa mga police operations kaangay sang drug buybust operations.
Maayo man nga may yara sang body camera agud nga indi matamper ang mga ebidensya kag mahimo nga makita ang tanan nga natabo sa police operations.
Suno kay Donasco, ang body cameras ang indi man mahimo nga mapatay sang police personnel nga nagagamit sini, bangud sarang ini gihapon nga mapaandar sang PNP command center.
Apang ang camera ang sarang lang nga magamit sa sulod sang walo ka oras.
Responsibilidad naman sang mga police personnel nga naggamit sang body cameras ang paghalong sini, kag ang sarang lang nga makagamit amo ang mga natrain diri.
Ginagamit naman sadto pa sang PNP ang body camera apang sa pili lang nga mga police personnel.
