Ginpakigbahin ni Bacolod City Mayor Evelio “Bing” Leonardia nga ang panibag-o nga mga pagsulundan santo sa Executive Order No. 31 series of 2021 kaangay sang 10PM-4AM curfew kag liquor ban ang resulta sang mga ginpatigayon nila nga meeting kaupod ang mga doktor kag business sector.
Suno sa alkalde, nagmeeting sila sang tinalikdan nga semana upod ang mga infectious diseases doctors nga amo ang nagapanguna sa pagtatap sa mga positibo sa COVID-19 kag naghatag naman sang mga proposisyon.
Kasunod sina, nagpatigayon man sang joint conference ang mga opiysal sang ciudad kag mga doktor, nga gintawag sini nga consultation dialogue.
Ginpatpat sang opisyal ang detalyado nga mga proposal sang mga doktor sa mga negosyante kun sa diin ang mga ponto nga magkaangay nga gin-aprubahan sang duha ka sector amo ang ginpatuman sa ginpagwa nga EO 31.
Paathag ni Leonardia nga sa paglantaw sa negosyo, kabahin man diri ang pagkonsiderar sa mga empleyado nga sarang madulaan sang palangabuhian.
Isa sa mga proposal sang mga doktor amo ang pagdumili sa pagpatigayon sang “dine-in” sa mga restaurant, nga ginpamalabagan naman sang mga negosyante, bangod mangin kaangay na ini nga indi sila makaganar.
Dugang man nga ginpropose sang mga medical professionals ang pagsarado sa mga sinehan, malls, beauty salons, barbershops kag iban pa nga mga establishimento nga wala man napahanugutan, bangod suno kay Familiaran, kaangay na ini sa lockdown.
Dugang pa sang alkalde nga kun patigayunon ini, magakinahanglan man nga maghatag sang ayuda ang gobyerno nasyonal kag lokal sa mga madulaan sang palangabuhian, apang wala naman sang magamit nga pondo para diri.
Paathag naman ni Leonardia, nga modified general community quarantine (MGCQ) ang ciudad sang Bacolod, kag ang quarantine status ang may kadungan nga lebel sang pagpatuman santo sa pagsulundan sang National Inter-Agency Task Force (NIATF).
Santo sa nakasugtan sang mga doktor kag business sector, ginpatuman sumugod kagab-i ang pagpalawig sang curfew hours humalin alas-10:00 sang gab-i tubtob alas-4:00 sang aga, gikan sa alas-11:00 sang gab-i tubtob alas-4:00 sang aga; kasubong man ang pagpatuman sang liqour ban.
