Nag-ayo ang gobernador sang probinsya sang Negros Occidental sa Regional Inter-Agency Task Force (RIATF) sa ila zoom meeting nga mapasugot ini nga mapabilin sa Modified General Community Quarantine (MGCQ) apang dapat nakaheightened alert kaangay sang ginapatuman sang National Capital Region (NCR) kag Metro Manila.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga dapat pasugtan ang probinsya nga magpatuman sang 30 percent lang ang makatambong sa mga pagtililipon agud mapanubuan man ang kaso sang COVID-19 sa probinsya.
Aminado man ini nga nagasaka kag panaug ang kaso sang COVID-19 sa probinsya kasubong man sang iban nga Local Government Units sa Western Visayas.
Samtang, nalipay man ini bangud nagasaka man ang interes sang mga pumuluyo agud magpabakuna apang indi man malipod nga may nalakip sa mga priorities sang vaccination roll out kaangay sang A2 nga madamo pa ang hesitant.
Ginpahayag man ni Lacson nga nakabasa siya sang article nga gin-umpisahan na ang vaccination roll out sa A4 ukon economic frontliners kaangay sang BPO employees sa NCR kag mga probinsya sang Laguna, Batangas kag Cavite apang kinahanglan pa sini athagon kun nalakip ang probinsya sang Negros Occidental nga magpatigayon sang vaccination roll-out sa A4.
Kahapon, may nag-abot nga 16,000 doses sang Sinovac para sa probinsya nagikan sa Regional Department of Health.
Suno sa gobernador, may isa ka LGU sa probinsya nga tuman ka hinay ang vaccination roll-out apang dapat nga mapadangat ang problema sa probinsya agud mabuligan nga mapadasig ang problema.
Suno kay Lacson nakadepende sa kadasigon sang roll out ang paghatag sang national government sang bakuna.
Nagpanugyan man ang gobernador nga sundon ang tanan nga minimum health protocols kag likawan ang pagtililipon agud nga indi na magpadayon sa pagsaka ang kaso sang COVID-19 sa probinsya.
