Makaligad ang tatlo ka adlaw, nasapwan na ang bangkay sang lima ka tuig nga bata nga babayi nga namissing matapos maanod sa suba sa La Carlota sang Domingo sang hapon.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, nakit-an kaina sang aga ang bangkay ni Mary Rose Cadenas sa Barangay RSB sa amo nga ciudad.
Ini ang kapin 10 kilometros tubtob 15 kilometros nagikan sa lugar nga iya naanuran sa Barangay La Granja.
Suno kay Guadalupe, may nakakita nga isa ka bata nga bangkay nga nagautaw-utaw sa idalom sang handong sang kawayan kag nanugid ini sa iya amay.
Gilayon nga ginpadangat ang report sa Local Disaster Risk Reduction and Management Office sang La Carlota City kag Pontevedra nga gilayon man nga nagresponde.
Positibo nga ginkilala sang pamilya nga si Cardenas ang bangkay.
Madumduman nga sang Domingo, magatabok kuntani sa suba ang iloy kaupod sang duha sini ka kabataan nga naga-edad lima kag duha ka tuig agud nga magpakaon sang mga hinuptan nga manok kag mga baboy.
Una nga gintabok sang iloy ang lima ka tuig nga bata nga babayi, kag temporaryo nga gintungtong ini sa isa ka bato sa kilid sang suba bangod pagabalikan pa sini ang duha ka tuig nga bata.
Sang makadangat sa duha ka tuig nga bata, hinali naman nagdalom ang tubig sa suba dala sang makusog nga daludo sang tubig gikan sa bukid.
