Aminado si Bacolod City Councilor Renecito Novero nga mabudlay kasuhan sang murder ang isa ka COVID positive nga nakalaton sa iban kag nagtaliwan ang nalatnan sang virus.
Madumduman nga sa meeting nga ginpatigayon sang Inter-Agency Task Force sang Lunes sang gab-i, ginpakigbahin ni chief presidential legal counsel Salvador Panelo nga may mga mabug-at nga penalidad nga sarang mapatuman sa mga padayon nga nagabayolar sa health protocols nga gintalana sang gobyerno.
Suno kay Panelo, ang una nga sitwasyon, kun wala nakahibalo ang isa ka persona nga may masakit ini kag ang nalatnan sini ang mapatay, posible nga homicide ang iya pagaatubangon.
Apang kun may sensitibo ini nga pilas ukon injury, posible nga reckless imprudence resulting to physical injury ukon depende kun ano ini kaseryoso.
Apang kun nakahibalo ang isa ka persona nga may virus ini kag nagpadulong siya gihapon sa isa ka lugar, makabig ini nga murder bangud intentional ini nga pagpatay.
Sa interview sang Bombo Radyo Bacolod kay Novero, mabudlay pamatud-an sa korte ang rekomendasyon ni Panelo.
Suno kay Novero, posible pa nga mapasakaan sang kaso nga reckless imprudence resulting to homicide ang COVID patient nga naglaton sa biktima.
Suno diri, mabudlay pamatud-an ang murder bangud wala man ini sang intensyon nga patyon ang biktima.
Maqualify lang nga murder ang kaso nga pangatubangon sang pasyente kun may intensyon sa pagpatay apang mabudlay ini bangud internal katama ang conviction sang tawo kun sa diin makita kun may intensyon ang tawo ukon wala.
Samtang mahimo naman nga mapasaka ang kaso nga reckless imprudence resulting to homicide sa pasyente bangud nakahibalo na ini nga siya ang infected kag nag-impon sa madamo nga tawo kag nakalaton.
Sa pihak sini, nagpanugyan si Novero sa mga pumuluyo nga maghalong kag magsunod sa minimum health protocols.
