Nagnubo ang numero sang krimen nga nagluntad sa ciudad sang Bacolod sa una nga lima ka bulan subong nga tuig kun ipaanggid sa kaangay nga period sang tuig 2020.
Santo sa Comparative Statistical Crime Incidents Report sang Bacolod City Police Office (BCPO), nagnubo sang 2.59% ang crime incidents halin Enero 1 tubtub Mayo 31, 2021 nga nagdangat sa 564 kun ipaanggid sa narekord sang Enero 1 tubtub Mayo 31, 2020 nga naglab-ot sa 579.
Sa interview sang Bombo Radyo Bacolod kay BCPO deputy spokesperson Police Lt. Ma. Liberty Indiape, 17 ka murder cases ang narekord sa una nga lima ka bulan subong nga tuig, mas manubo ini sang isa kun ipaanggid sa 16 sa kaangay nga period sang tinalikdan nga tuig.
Nagsaka sang isa ang homicide cases nga nagdangat sa tatlo nagikan sa duha sang tuig 2020.
Wala man sang pagbag-o sa kaso sang physical injury nga nagdangat sa 18.
Ang rape cases ang nagdangat sa 10, nagikan sa 19 tinalikdan nga tuig; 13 ka robbery cases nagikan sa 18; samtang nagsaka naman sa 51 ang kaso sang theft nagikan sa 45.
Wala sang narecord sa carnapping sang auto nakaligad nga tuig, apang sa karun may yara sang isa; samtang sa carnapping sang motorsiklo, nagsaka ini sa tatlo nagikan sa isa tinalikdan nga tuig.
Wala man sang narecord sa special complex crimes sang tinalikdan nga tuig apang sa karun, may yara sang isa.
Sa special laws naman, may narecord sadtong 2020 nga 280 kag subong nga tuig may yara sang 335.
Sa non-index crimes, nakarecord sadtong 2020 sang 179 samtang subong nga tuig, nakarecord sang 103 nga kaso.
Suno kay Indiape, ang pagnubo sang crime incidents ang bangud sa intensified campaign sa anti-criminality nga ginapatigayon sang mga kapulisan kaangay sang 24/7 nga pagpatrolya, kag nagpasalig man si Indiape nga padayon nga himuon ini agud nga mapadayon man nga mapanubo ang kriminalidad sa syudad.
