Ginkalipay sang tagpamaba sang Negros Occidental Police Provincial Office (NOCPPO) ang paghatag sang Kongreso sang assurance nga mapasar ang P128-billion Revitalization and Capability Enhancement Program sang Philippine National Police nga igapatuman sa sulod sang napulo katuig humalin sa tuig 2022.
Ang Revitalization and Capability Enhancement Program ang ginsubmit sang PNP sa Kongreso sadtong tuig 2019.
Suno kay PNP chief Police General Guillermo Eleazar, ang proposed budget sang enhancement program ang wala nalakip sa regular nga pondo sa idalom sang annual General Appropriations Act.
Sa interview sang Bombo Radyo Bacolod kay Police Lt. Abegael Donasco, dako ang mabulig sang programa agud maimprove ang mga kakulangan sa PNP.
Suno kay Donasco, dako nga bahin sang Revitalization and Capability Enhancement Program ang rehabilitation sang mga police stations.
Magluwas sa mga rehabilitasyon, makadugang man ang pondo sa pagbakal sang mga salakyan kag mga cameras, kasubong man nga makabulig ini sa mga bag-ong recruit sang PNP.
Makabulig man ini sa pagpasanyong sang mga crime labs sang Scene of the Crime Operatives (SOCO).
Nagalaom man si Donasco nga makaigo ang pondo para sa mga physical structures nga ipatindog sang ahensya.
