Tinutuyo sang ginpatigayon nga duha ka adlaw nga License to Own and Possess Firearm (LTOPF) caravan sa San Carlos City nga mabuhinan ang kaso sang illegal possession of firearms sa probinsya sang Negros Occidental, suno sa tagpamaba sang Negros Occidental Police Provincial Office (NOCPPO).
Ang LTOPF caravan ang nagsugod subong nga adlaw kag magatakop bwas.
Sa interview sang Bombo Radyo Bacolod kay NOCPPO deputy spokesperson Police Lt. Abegael Donasco, ginapahanumdum sini ang mga pumuluyo nga luyag nga magpasakop sa LTOPF caravan nga wala sila sang batunon nga walk-in.
Suno kay Donasco, magbisita lamang sa website sang Negros Occidental Police Provincial Office ukon sa Facebook page agud nga makakuha sang nagakaigo nga impormasyon para sa mga requirements sang LTOPF.
Indi man dapat pagkalimtan nga makig-angot sa malapit nga police stations sa ila lugar ukon mahimo man sa website sang pnpfeo.net kag feo.csg.pnp.gov.ph para sa pre-registration.
May ipatuman man sila nga heirarchy kun sa diin sa una nga adlaw igacater ang mga miyembro sang judiciary ukon mga abugado.
Kag sa ikaduha nga adlaw naman ang iban nga may luyag nga magkuha sang lisensya sang armas-luthang.
Ginaobserbar man ang social distancing kag minimum health protocols kag indi man sila magrisgo nga maglapas sang ginapatuman nga pagsulundan.
