Padayon pa ang imbestigasyon sang Bacolod Police Station 4 angot sa pagpatay sa lalaki nga nagatindog sa tabok sang barangay hall sang Barangay Estefania, ciudad sang Bacolod pasado alas-10:00 kagab-i.
Nahibaluan nga nagatindog ang biktima nga si Danilo Sangcap Jr. malapit sa intersection sang nag-abot ang itom nga Montero Sport nga ginasakyan sang apat ka mga suspetsado kag siya ang gintiro.
Sang natumba ang biktima nga tumandok sang Barangay 7, Poblacion, Victorias City, ginpalapitan pa gid ini sang mga suspetsado kag gintiro liwat.
Onse tanan ka basiyo sang caliber .45 pistol kag .9mm pistol ang narekober sang mga pulis sa crime scene.
Suno kay Police Major Jun Ray Batadlan, station commander sang Bacolod Police Station 4, yara ang biktima sa drugs watchlist sang Victorias City Police Station.
Ginalantaw naman nga may ginaistaran ini sa ciudad sang Bacolod.
Sa pagpakig-angot naman sang Bombo Radyo kay Police Lt. Col. Eduardo Corpuz, hepe sang Victorias City Police Station, nadakpan na sadto si Sangcap bangud sa illegal gambling apang wala ini sang rekord nga nadakpan bangud sa illegal drugs kag indi man siya drug surrenderer.
May mga drug pushers naman nga nadakpan sang mga pulis sa Victorias nga nagtuad nga kay Sangcap sila nagakuha sang shabu.
Nagagwa sa monitoring sang Victorias City Police Station nga talagsa nalang nagapauli sa ciudad si Sangcap apang nagapati si Corpuz nga mahimo nagahulag gihapon diri ang galamay sang biktima.
Sa pihak sini, indi mahambal ni Corpuz kun naangot sa illegal nga druga ang pagpatay kay Sangcap.
