Sa pihak sang krimen nga nagluntad sa Barangay Estefania sa ciudad sang Bacolod bisan sulod na sa curfew hours kagab-i, ginpasalig sang Bacolod City Police Office nga hugot nga ginapatuman ang 10PM to 4AM nga curfew sa ciudad, santo sa executive order sang alkalde.
Sa interview sang Bombo Radyo kay BCPO spokesperson Police Major Sherlock Gabana, diutay lang ang nadakpan nga violators humalin sang nag-epekto ang EO sang Hunyo 6.
Suno kay Gabana, nagalibot ang patrol car kada gab-i kag labi nga ginabantayan ang Biyernes kag Sabado sang gab-i kun sa diin madamo sang nagagwa kun gab-i.
Pagpanghangkat naman suno kay Gabana ang pagbantay sa bilog nga ciudad bangud isa tubtub duha lang ang patrol car sang kada police station.
Kadungan sini, nagpanawagan ang BCPO spokesperson sa mga Bacolodnon nga sundon ang EO sang alkalde bangud gamay man lang ini nga sakripisyo para sa kaayuhan sang tanan.
Ang mga pasaway naman kun kaisa suno kay Gabana ang mabutang sa peligro kaangay sang ginpatay nga si Danilo Sangcap Jr. bangud yara pa ini sa gwa bisan pasado na alas-10:00 sa gab-i.
