Hugot nga nagabantay ang Negros Occidental Police Provincial Office (NOCPPO) sa ginbutang nga mga border control checkpoints sa probinsya kasunod sang pagpapanaog ni Governor Eugenio Jose “Bong” Lacson sang Executive Order 21-30 nga epektibo humalin Hunyo 15 tubtob Hunyo 30, 2021.
Sa interview sang Bombo Radyo kay NOCPPO Deputy Spokesperson Police Lt. Abegael Donasco, lima ka mga border control ang ginbutang sa probinsya kag ini ang nahamtang sa Kabankalan, San Carlos, Isabela, Hinobaan kag La Castellana.
Suno sa iya, may mga inner border controls man nga nahamtang humalin sa Bago City padulong sa Bacolod kag Talisay City padulong sa ciudad.
Suno sa iya, may mga pulis na nga nagabantay sa borders kag nagashifting sila agud ila maubra sang maayo ang trabaho.
Sa karun maayo man ang ila assessment kag wala sang may nagakatabo nga resistance.
Nagpanugyan naman ang hepe sang Isabela Municipal Police Station sa publiko nga kun wala man lang sang importante nga tinutuyo kag indi man lang essential nga magtabok sa Negros Oriental, indi nalang magpadulong didto.
Sa interview sang Bombo Radyo kay Police Captain Ryan Villasario, hugot nila nga gina-implementar ang border control kag mga essential travel lang ang ginapahanugutan nga makalabay subong man ang mga authorized person outside residence (APOR) kag mga cargo.
Sa ila assesment, wala man sang may nagapamilit nga magsulod ukon magbayolar sa pagsulundan.
