Ginalantaw sang Bacolod Police Station 6 nga wala naangot sa illegal nga druga ang motibo sa pagpatay sa tricycle driver nga si Arnold Bayking sa gwa sang Sharina Heights sa Barangay Taculing kagab-i.
Nahibaluan nga gilayon nga ginbawian sang kabuhi si Bayking nga residente sang Purok Progreso, Barangay Taculing sang gintiro sang mga suspetsado sa ulo.
Idul-ong kuntani sang biktima ang babayi nga pasahero sa Barangay 28 sang gintupungan sang mga suspetsado kag gintiro.
Suno kay Police Major Leo Estopa, station commander sang Bacolod Police Station 6, personal nga rason ang ginalantaw nga motibo sa krimen bangud indi man drug personality si Bayking.
Nagagwa sa imbestigasyon nga ginsundan sang mga suspetsado si Bayking.
Suno sa misis sang biktima, wala sang kontra ang iya bana kag wala man ini nakabaton sang pamahog sa kabuhi.
Sa karon, ginahibalo sang imbestigador kun sanday sin-o ang ulihi nga kaupod sang biktima kag ginatsekyar man ang background sang babayi nga pasahero.
Suno kay Estopa, indi pa mahambal kun mistaken identity ang natabo ukon ang babayi nga pasahero ang target sang mga suspetsado apang ang driver ang naigo.
