Ginpirmahan na ni Bacolod City Mayor Evelio “Bing” Leonardia ang mando angot sa suspensiyon sang tradisyunal nga pagsaulog sang kapiestahan ni San Juan de Bautista sa Hunyo 24.
Santo sa Executive Order No. 32 sang alkalde, ginadumilian ang pagpatigayon sang excursion, picnics, revelries, ukon ano man nga social gatherings sa nasambit nga adlaw.
Nakasaad man sa EO nga ginadumilian man pagbasya sang tubig sa pampubliko nga lugar, dalanon, sidewalks, simbahan, ukon sa ginatrabahuan.
Ginadumilian man ang pagtililipon sa mga pampubliko nga lugar kalakip na sa mga beaches.
Siraduhan man ang mga tourism establishments sa apat ka mga barangay sa ciudad sang Bacolod sa adlaw sang Fiesta ni San Juan.
Ini ang kasunod sang pagpatigayon sang consultation meetings, sa pagpanguna nanday Mayor Bing Leonardia, Vice-Mayor El Cid Familiaran kag iban pa nga opisyales sang Emergency Operations Center, upod sa mga tag-iya sang mga beach resorts, mountain resorts, bars, restaurants kag mga kapehan sa Barangays Punta Taytay, Pahanocoy, Alangilan, kag Granada sadtong Hunyo 18 kag 19.
Nag-ugyon ang mga tourism establishment owners sa pangabay sang lokal nga gobyerno nga magsira sa amo nga adlaw bilang kabahin sang mga tikang sang syudad agud matapna ang paglapta sang COVID-19 sa Bacolod.
Santo sa ginpagwa nga statement ni Leonardia nga kinaandan na ang pagtipon sang madamo nga tawo tagsa magsaulog sang Kafiestahan ni San Juan kag ini ang luyag nga likawan ilabi na subong nga panahon sang pandemya.
Naga-apelar man ang alkalde sang kooperasyon sang tanan agud matapna ang makatalagam nga virus.
Matapos ang consultation meetings, gin-issue ni Leonardia ang Executive Order No. 32 series of 2021 nga nagasuspendir sang public celebration sang Feast of St. John the Baptist sa ciudad sang Bacolod.
