Hugot nga ipatuman sang Bacolod City Police Office (BCPO) ang mandu sang alkalde sang Bacolod City angot sa pagpasirado sang mga resorts sa adlaw sang Kapiyestahan ni San Juan de Bautista sa Hunyo 24.
Santo sa Executive Order No. 32 ni Mayor Evelio Leonardia, ginadumilian ang pagpatigayon sang excursion, picnics, revelries, ukon ano man nga social gatherings sa nasambit nga adlaw.
Nakasaad man sa EO nga ginadumilian man ang pagbasya sang tubig sa pampubliko nga lugar, dalanon, sidewalks, simbahan, ukon sa ginatrabahuan.
Ginadumilian man ang pagtililipon sa mga pampubliko nga lugar kalakip na sa mga beaches.
Sa interview sang Bombo Radyo Bacolod kay BCPO spokesperson Police Major Sherlock Gabana, may yara na sila nga gintulinan nga mga kapulisan agud magpatuman sang pag-obserbar sang minimum health protocols.
Suno kay Gabana, gin-assign na ang mga kapulisan sang respective police stations, katapo sang Bacolod City Mobile Patrol Unit kag Bacolod City Mobile Force Company nga magapatigayon sang police presence kag police visibility sa mga resorts.
Magapatigayon man sang road security para sa mga motorista nga magakinahanglan sang police assistance.
Nagpanawagan man ini sang kooperasyon sang tanan sa pagsunod sa Executive Order sang alkalde.
Ginpahayag man sini nga kinahanglan ang gamay nga sakripisyo bangud para man ini sa kaayuhan sang tanan.
Samtang ang madakpan nga mga resort owners nga magalapas sang EO ang imbestigaran kag mahimo nga mapasakaan sang kaso sang Bacolod City Legal Office.
Sarang naman ini nga magaresulta sa revocation of license to operate sa mga resorts, kag ang mga indibidwal nga madakpan nga wala nagsunod ang issuehan naman sang citation ticket kag sarang magpangatubang sang kaso maykaangtanan sa Article 152 sa idalom sang revised penal code ukon disobedience to an agent of a person in authority.
