Ginkawat ang metal nga tabon sang drainage nga nahamtang sa tabok sang Robinsons sa Barangay Mandalagan, Bacolod City kagab-i.
Sa pagpadulong sang Bombo News Team sa lugar, ginpahayag sang security guard nga may nagreport sa ila nga concerned citizens nga may manhole sa nasambit nga lugar kag sang ila ginpadulungan, temporaryo nila ini nga gintabunan agud wala sang may madisgrasya nga nagalabay.
Ginaalegar duha ka mga persona nga nagasakay sa tricycle ang nagkawat sang metal nga tabon sang drainage nga ginabanta nagabug-at sang 30 kilos.
Gilayon naman nga ginpadulungan ni Bacolod City Lone District Congressman Greg Gasataya ang lugar matapos nakit-an ang post tuhoy diri sa social media kag ginpahayag iya ipatsekyar kun ang drainage ang ginapanag-iyahan sang telecommunications company ukon sang Department of Public Works and Highways.
Suno diri, subong nga adlaw, iya ini pakadtuan sa natungdan agud makay-o kag mahatagan sang nagakaigo nga tabon.
Pagatsekyaron man ang mga CCTVs malapit sa lugar agud mahibaluan kun sanday sin-o ang nagkawat sang tabon sang drainage.
