Natalana nga pasakaan sang kaso sang isa ka babayi ang iya tiyo matapos nga ginhaboyan ini sang granada sa Sitio Anangge, Barangay Buenavista, Murcia, Negros Occidental.
Suno kay P/Capt. Jerald Muya, hepe sa Murcia Municipal Police Station, ang suspetsado ang ginkilala kay Jimmy Alimaña, 40 anyos kag residente sa lugar.
Samtang ang biktima naman ang ginkilala kay Mylene Alimaña, 29 anyos, hinablos kag kaingod balay sang suspetsado.
Pahayag ni Muya nga hubog sadto ang suspetsado sang natabo ang insidente sang Dominggo, Hunyo 20, alas-2:00 sang hapon.
Nahibaluan man nga may daan na nga hiligut-anon ang magtiyo nga ginalantaw na-trigger sang ini ang mahubog.
Sa panaysayon sang biktima sa mga kapulisan, ginpakigbahin sini nga ginhaboy siya sang Granada sang iya tiyo samtang yara sa atubang sang iya balay.
Apang bangod sa wala ini makahibalo sa ginhaboy sa iya kag ginpinsar nga bato ini, ginkahig nya naman ini gamit ang kahoy pabalik sa suspetsado.
Bangod sa kahadlok sang tiyo nga maglupok ang Granada nga ginbalik sa iya, nagdalagan naman ini kag nabilin pa ang dala sini nga improvised shotgun ukon sulpak.
Ginapakamaayo naman nga wala mapalos sang hubog nga suspetsado ang pin sang granada gani wala ini maglupok.
Suno kay Muya, nakapalagyo na ang suspetsado sang mareport sa ila ang insidente gani wala na nila natumod kun sa diin ini nagpalagyo.
Samtang narecover naman sang mga ini ang granada kag ang nabilin nga improvised shotgun.
Natalana nga magfile sang reklamo ang hinablos subong nga adlaw batok sa iya nga tiyo.
Suno kay Muyo, wala naman sang record sa Murcia PNP ang suspetsado, apang tsekyarun pa nila sa Barangay kun may record ini.
