Ginkumpirmar sang regional director sang National Police Commission (NAPOLCOM) Region 6 nga nabaton na nila ang kopya sang dismissal order nagikan sa NAPOLCOM National Office batok sa anom ka mga pulis kalakip na ang anay hepe sa Moises Padilla Municipal Police Station.
Ini ang may kaangtanan sa ginpatigayon nga checkpoint operation sa Crossing Magallon, Moises Padilla, Negros Occidental sadtong Disyembre 19 tuig 2017 kun sa diin ila nga gindakop ang anay bise alkalde kag karun alkalde na sang banwa nga si Ella Celestina Garcia-Yulo kaupod ang bana sini nga si Felix Mathias Yulo III.
Ginpakigbahin ni NAPOLCOM 6 Director Atty. Joseph Celis, nga ang desisyon ang natatakan sang Oktubre 21, 2020 pa kag napirmahan sang pila ka mga matag-as nga opisyal sadto kag subong.
Desyembre 19, 2017, nagpatigayon sang checkpoint operation ang hepe nga si Police Captain Allan Reloj kag lima ka mga kaupod nga sanday Police Master Sgt. Ricardo Dingcong Jr., Police Corporal Nobel Perante, Police Corporal Felis Pesales Jr., Patrolman Michael Mondido kag Patrolman Darryl Dormido.
Ang mag-asawa nga Yulo ang sakay sa Mitsubishi Strada sadto sang ginbanggaan sila sang anum ka mga respondents.
Ginapatihan nga nagpagamit ang mga kapulisan sa anay alkalde sang banwa nga si Magdaleno Peña samtang nagahilapit na sadto ang 2019 elections.
Ang anum ka mga kapulisan ang ginkasuhan sa ginbuhat nga ginapatihan illegal chech point kag unlawful alert nga bayolasyon sa Napolcom Circular 2016-002 kag 2013 PNP Police Operational Procedure.
Kaupod man sang mga ini sa checkpoint ang Barangay Peace Action Team (BPAT).
Ginpagwa ang mga ini sa salakyan kag ginposasan apang wala manlang ginsambit ang miranda rights.
Magatawag man kuntani ang bana nga Yulo sa alkalde sang banwa sang La Castellana, apang ginpunggan ini kag ginsulod na sa salakyan.
Nag-abot naman ang pamilya sang complainants kag magakuha man kuntani sang video sa ulihi nga bahin sang insidente apang nagpalupok sang armas ang hepe gani wala na ini mahemo.
Samtang gindala naman ang mga biktima sa Police Station kag didto ginbuhat ang search kun sa diin nakita ang 40 ka panid nga P1,000 bill kag 20 ka panid sang P50 bill, cellphone, .45 cal. Armscor 1911 nga may tatlo ka magazine kag 25 ka live ammunition.
Gin-ako man sang lalaki nga Yulo nga iya ang kwarta kag armas-luthang apang panindugan sini nga may nagakaigo ini nga lesensya kag nakasulod pa sa box sadto.
Apang panindugan sini nga planted na ang gindugang nga mga ebidensya nga ginalakipan sang duha ka .45 cal pistol nga caspian kag ordnance, duha ka granada kag duha ka sachet sang shabu nga nagnegatibo man sa Crime Laboratory.
Ini naman ang nagpalala pa sa kaso sang mga pulis nga ginatawag incriminatory machination santo sa revised penal code. Samtang, kasunod sang mando nga dismissal sa anum ka mga kapulisan sa kaso nga grave misconduct and grave irregularities in the peformance of duty sa Moises Padilla, nagpahanumdom si National Police Commission (NAPOLCOM) Region 6 Director Atty. Joseph Celis sa mga kapulisan nga magpaminsar anay antes maghimo sang indi matarong bangod magabalik ini sa ila.
Suno kay Celis, indi sarang matago sa malawig nga tinion ang katuntuhan.
Gin-ako sini ngasulit-sulit na ang mga ini sa pagpahanumdom nga himuon kun ano ang maayo kag ipatuman ang hustisya sang patas.
Ilabi na sa karun nga nagahilapit ang eleksyon, panugyan sini nga segurohon nga mamintinar ang patas nga pagtratar sa tanan kag kun indi matago ang indi maayo nga pinsar, sila na dapat ang mismo magrelieve sang ila kaugalingon.
Paathag ni Celis nga ang magapatuman sang dismissal order amo ang Philippine National Police (PNP) kag record purpose lang ang papel sang NAPOLCOM.
Paathag sini nga natapos na ang ila papel sa kaso, gani ang abogado na sang mga ini amo ang makasabat sa pagpadayun sang kaso.
Dugang pa sini nga may mga legal nga tikang man nga dapat buhaton ang mga ginpanaugan sang dismissal order kun luyag nila nga ipakigbato ang kaso, bangod kabahin man ini sang ila kinamatarung.
Suno kay Celis, sa tion nga mabatun na sang mga kapulisan ang mail natuhoy sa kaso, indi naman mahemo nga idelay ang reglimintary period.
Panindugan man sini nga wala sang rasun para tinguhaan pa ang legal delay bangod naggwa na ang kamatuoran santo sa ebidensya.
Suno kay Celis, indi basta-basta magapagwa sang dismissal order ang NAPOLCOM kun indi ini seryoso nga kaso.
Wala naman sini ginakalipay ang hitabo kag nagalaom nga magaserbe na ini nga leksyon sa mga kapulisan nga mangin matarung sa pagpatuman sang layi.
