Nagsumiter ang mga police stations sa ciudad sang Bacolod sang report sa operations branch sang Bacolod City Police Office angot sa ila monitoring sa mga resorts sa ciudad kadungan sang Kafiestahan ni San Juan de Bautista subong nga Huwebes.
Suno kay Police Major Ritchie Gohee, station commander sang Bacolod Police Station 9, nagsugod ang mga pulis sa pagbantay sa entrance sang Barangay Punta Taytay, alas-6:00 sang aga kun sa diin nagbutang sang mga signages nga sirado ang mga resorts kag viewing deck subong nga adlaw.
Suno sa station commander, nagalibot ang mga personnel sang Police Station 5 sa Barangay Punta Taytay kag nagabulig man ang mga barangay tanod.
Aware naman ang religious sector nga ginapahanugutan sila nga magpatigayon sang misa apang 30 porsyento lang sang capacity ang sarang nga maakomodar sa simbahan.
Suno kay Gohee, ginrequire sila nga magsumiter sang report sa pinuno sang Operations Branch sang BCPO nga si Police Lt. Col. Lester Leada kada tatlo ka oras halin alas-6:00 sang aga asta subong nga hapon.
Aminado si Gohee nga cooperative ang mga residente sa Barangay Punta Taytay kaangay sang natabo sang Easter Sunday kasunod man sang istoryahanay kaupod ang city officials kag mga resort owners.
Nagpasalamat man ang mga resort owners nga isa lang ka adlaw ang closure, indi kaangay sa probinsya sang Negros Occidental nga tatlo ka adlaw nga wala sang operasyon.
