Naghatag ang Armed Forces of the Philippines sang arrival kag full military honors kay anay Presidente ‘Noynoy’ Aquino III sa Manila Memorial Park sa Parañaque City kaina sang udto.
Pag-abot sa memorial park alas-12:40 sang udto, ang urn ukon ang ginabutangan sang abo ni Aquino ang ginwelcome ni AFP Chief of Staff General Cirilito Sobejana kag Philippine National Police chief Police General Guillermo Eleazar.
Ang utod ni Aquino nga si Ballsy Aquino-Cruz ang nagdaho sang urn sa isa sa mga honor guards.
Ang full military honors ang nagsugod alas-12:50 sang udto.
Gintukar sang banda ang national anthem sang Pilipinas samtang nagahatag ang military sang 21-gun salute sa former commander-in-chief.
Gintungtong ang Philippine flag sa ibabaw sang urn ni Aquino.
Ang urn ang gindala sa honor guards sa funeral hearse nga napuno sang yellow nga mga bulak.
Gilayon nga ginpatigayon sang military officials ang funeral march bilang paghatag sang honor sa anay chief executive.
Naghulog naman ang Philippine Air Force helicopter sang petals sang yellow nga mga bulak antes nagsugod ang funeral march.
Ini ang kasunod man sang funeral mass nga ginpatigayon sa Church of the Gesu sa Ateneo de Manila University sa Quezon City.
Naghatag man ang Bureau of Fire Protection sang water salute sa tion sang procession sang urn.
Nagpatigayon man ang AFP sang simultaneous gun salutes sa NCR military camps kag malapit nga mga kampo bilang pagkilala sa anay commander-in-chief.
