Nagapanawagan ang pamilya ni Danilo Toreña nga mahatagan sang hustisya ang kamatayon sang senior citizen nga gintiro sang mga suspetsado nga nagaangkasanay sa motorsiklo sa Angeles St., Canetown Subdivision, Barangay 19-A, Victorias City, kaina sang aga.
Suno sa utod ni Toreña nga si Theresa Pajarillo, mabuot, balaynon kag maalwan nga klase magulang ang biktima.
Suno kay Pajarillo, duha na ka tuig ang estorya nga nagalagaw nga may kaangtanan sa iligal nga druga ang iya magulang apang naacquit man ini sa ginpangatubang nga kaso.
Wala man sang nabaton nga pamahog sa kabuhi ang ila magulang kag wala man ini nakapanugid nga may yara siya sang kontra nga posible maghingabot sang iya nga kabuhi.
Suno kay Pajarillo, may duha ka anay live-in partners si Toreña apang wala ini sang kaupod sa pagpangabuhi sa karon.
Suno diri, kuntani masolbar sang Victorias City Police Station ang pagpatay sa iya magulang.
