Indi komporme ang United Negros Transport Cooperative (UNETCO) sa mandu sang Land Transportation Franchising and Regulatory Board (LTFRB) nga ma-install ang public utility vehicles (PUVs) sang contact tracing mobile application nga StaySafe.ph.
Sa advisory sang LTFRB, tinutuyo sang contact tracing app nga mabuligan ang gobyerno sa pagtapna sa pagsaka sang kaso sang Covid-19.
Suno sa LTFRB, ang mga PUV operators kag drivers ang igarequire nga magparehistro sa StaySafe.ph, maghimo sang kaugalingon nga QR code, kag ipatapik sa sulod kag entrances sang PUVs, kag igarequire ang tanan nga mga pasahero nga maggamit sang QR codes sa sulod sang 30 ka adlaw humalin sang publication sang LTFRB publication sang Memorandum Circular No. 2021-041.
Ang tanan nga data nga nabutang sa nasambit nga application ang mangin available sa LTFRB, subject to the Data Privacy Act, samtang ang PUV operators kag drivers ang required nga magcoordinate sa StaySafe.ph para sa assistance sa pagkolekta kag paggamit sang data nga nakarehistro sa app.
Ang memorandum circular ang ginpublish sadtong Hunyo 21 kag pursuant ini sa Inter-Agency Task Force for the Management of Emerging Infections Disease’s (IATF-EID) Resolution No. 87 series of 2020.
Ang mapaslawan nga magcomply sang nasambit nga probisyon ang kabigon nga “violation of IATF health protocols, kag may ipatuman nga nagakaigo nga penalidad.
Ang penalidad ang ginalakipan sang posible nga pagrevoke sang Certificate of Public Compliance ukon Provisional Authority.
Sa interview sang Bombo Radyo kay UNETCO officer Romelei Soliguen, sila ang nagasuporta gid sa mga programa sang LTFRB ilabi na sa PUV modernization program apang sa bag-o nga guidelines sang ahensya tuhoy sa pag-install sang contact tracing app, wala ang mga ini nagakompormi.
Suno kay Soliguen, tradisyunal man ukon modernize nga pamaagi, makabig ini nga hassle para sa driver kag operator ilabi na nga sa mga depasahero nga jeep bangud yara sa likod nagasaka ang mga pasahero.
Dugang man nga palas-anon ang pagproseso sang mga operators kag drivers agud makakuha sang application.
Suno sa iya, tuman ini kahassle kag mas maayo kuntani kun magtipon anay ang LTFRB sang opinion sang publiko ilabi na sang mga operators kag drivers kun sila ang magpasugot.
Suno diri, applicable ini sa mga salakyan nga modernize kag point to point unit apang mabudlay ini para sa mga traditional nga jeepney.
