Ginbaton ni Senator Manny Pacquiao ang pagpanghangkat ni President Rodrigo Duterte nga pangalanan sini ang mga opisina sang gobyerno nga imbolbado sa korapsyon sa idalum sang iya administration.
Ini matapos ginpahayag sang senador nga mas naglala ang korapsyon sang tatlo ka pilo kun ikumparar sa tion ni anay Presidente Benigno “Noynoy” Aquino III.
Sa Talk to The Nation ni Duterte sang Lunes, ginhangkat sini si Pacquiao nga itumod ang mga corrupt nga ahensya kag siya ang maghimo sang pamaagi tuhoy diri.
Suno kay Duterte, si Pacquiao ang sagay hambal nga tatlo ka beses nga mas corrupt ang iya administrasyon gani iya ini ginahangkat nga itudlo ang opisina nga corrup kag siya na ang bahala.
Suno diri, sa isa ka semana, may pagahimuon ini.
Gindugang man sini nga wala sang may ginhambal si Pacquiao sa iya sa nagliligad nga tuig kag puros lang dayaw tapus sa karun iya ini hambalan nga corrupt.
Suno kay Duterte, magakampanya ini batok kay Pacquiao kun ang senador ang indi makatumod sang mga corrupt nga opisyales sa idalum sang iya administrasyon.
Gindugang man sini nga kun indi sini mahimo nasambit, pagahambal sini ang mga pumuluyo nga indi pagbotohon si Pacquiao bangud isa ini ka butigon kag nagahampang lang sang pulitika.
Kahapon, ginpahayag ni Pacquiao nga iya ginabaton ang hangkat sang presidente kag ginpasalamatan niya ini sa oportunidad nga magbulig sa iya kag maghatag sang mga impormasyon para sa kampanya batok sa korapsyon.
Suno sa senador, magasugod sila sa Department of Health kun sa diin tsekyaron sang maayo ang tanan nga pinamakal humalin sa rapid test kits, PPE, masks kag iban pa.
Ginpamangkot man sini si DOH Sec. Francisco Duque kun handa ini nga ipakita ang kabug-usan sang ila nga gingasto kag kun diin nagkadto ang kwarta nga gin-utang sang pungsod para sa pandemic.
Ginhambalan man sini si Duterte nga apisar may mga sala ini nga nahimo sa kabuhi, iya ini ginkay-o kag duha lang ka butang ang iya ginapanindugan, indi ini butigon kag corrupt.
Ginakasubo man sini nga naga-inaway sila nga duha bangud sa isyu sa korapsyon nga dapat kuntani sila ang magbuligay tuhoy diri.
Si Duterte ang chairman sang PDP-Laban samtang si Pacquiao ang nagaserbi nga party president.
Suno kay Aquilino “Koko” Pimentel III, executive vice chairman sang PDP-Laban, dapat pahanugutan sanday Pacquiao kag Duterte nga kay-uhon ang ila mga isyu privately.
