Kasunod sang pagrelieve sa warden sang Negros Occidental District Jail, pagaimbestigaran sang Bureau of Jail Management and Penology ang mga jailguards nga on duty sang nagpalagyo ang lima ka mga inmates kahapon sang kaagahon.
Suno kay ni Jail Chief Inspector Jairus Anthony Dogelio, spokesperson sang BJMP Region 6, nagpadala ang regional office sang imbestigador agud mausisa kun ano gid ang natabo kahapon sang kaagahon.
Suno kay Dogelio, lima ang jailguards nga nakaduty sang nagpalagyo sanday Francisco Epogon, ang lider sang Epogon robbery group; Marvin Celeste, utod sini nga si Danilo Celeste, Alejandro Montoya kag Daniel Tamon.
Imbestigaran man kun paano nakasulod ang lagari nga gingamit sang mga inmates sa pag-utod sa kabilya sa bintana sang ila nga selda antes sila nagtaklas sa pader paagi sa ginsugpon-sugpon nga mga habol.
Suno sa BJMP Region 6 spokesperson, ang kaso administratibo ukon kriminal nga ipasaka batok sa mga jailguards ang magadepende sa mangin rekomendasyon sang ginpadala nga regional investigator.
