Nagapati ang Bureau of Jail Management and Penology nga wala pa nakapalayo sa Hacienda Veles, Barangay Blumentritt, Murcia ang tatlo ka mga inmates nga nagpalagyo sa Negros Occidental District Jail sang Martes sang kaagahon.
Nahibaluan nga sanday Francisco Epogon, Alejandro Montoya kag Daniel Celeste nalang ang ginapangita matapos nga mapatay sang mga pulis si Marvin Celeste kag nadakpan liwat si Danilo Tamon kahapon sang udto.
Suno kay Jail Chief Inspector Jairus Anthony Dogelio, spokesperson sang BJMP Region 6, gin-untatan kagab-i ang manhunt operation bangud madulom na kag delikado na sa mga otoridad bangud nagaulan.
May pila ka residente sa Smile Village nga nagpahayag nga nakabati sila sang lupok sa lugar apang wala sang kaangay nga report nga nabaton ang BJMP.
Kampante naman si Dogelio nga madakpan liwat ang tatlo ka mga pugante bangud madamo ang nagapangita sa ila matapos nga mag-upod man ang 1st Negros Occidental Provincial Mobile Force Company kag Murcia Municipal Police Station.
Nagpangabay man ini sa mga pumuluyo nga manugid gilayon sa mga otoridad kun nakita nila ang presensya sang tatlo.’
