Wala ginadula sang Victorias City Police Station ang anggulo sang pagpangawat ukon kaangtanan sang pugante nga nakagwa sa Negros Occidental District Jail sa pagluthang sa isa ka security guard sa Hacienda Florencia, Barangay 18-A, Victorias City sang Sabado sang gab-i.
Suno kay P/Lt. Col. Eduardo Corpuz, hepe sang Victorias City Police Station, ang biktima nga ginkilala kay Francis Legada, 23 anyos, single kag residente sang Barangay 1-A, Manapla, Negros Occidental ang nagaduty sa tunga sang katubuhan nga ginapanag-iyahan sang Victorias Milling Company, kun sa diin nahamtang ang ila detachment.
Ginkatingala naman sang hepe kun ngaa nagaisahanon lang ini apisar nga yara sa tunga sang katubuhan ang pwesto.
Ang lugar ang kapin 400 tubtob 500 metros pa ang kalayuon sa mga pamalay.
Bangod sini, ginlab-ot man ni Corpuz ang security guard agency para sa pagpaathag.
Gin-eksplekar sang mga ini nga duha kuntani ang upod nga security guard sa nasambit nga guard house, apang gindeploy sa lugar nga masami ang kinawatay ang kaupod sini.
Pahayag pa ni Corpuz nga kaangay lang nga ginhungod nga ibutang sa peligro ang kabuhi sang security guard sa pagbutang sini sa tunga sang katubuhan nga naga-isahanon.
Ginalantaw man sang hepe ang hitabo nga kaangay nga ginplanuhan na ngadaan.
Pahayag pa sini nga nakatawag pa sa radyo ang biktima gani gilayon man nga nakatawag sa Victorias City Police Station agud ipahibalo ang sitwasyon.
Sa karun wala pa matumod kun sin-o ang suspetsado.
Kasunod sang pagpatay, nadula man ang pila ka mga personal nga pagkabutang sang biktima kalakip na ang cellphone kag service firearm nga 12 guage shotgun nga nagaunod sang walo ka live ammunition.
Santo sa imbestigasyon, yara man ang posibilidad sang pagpangawat.
Samtang narecover naman ang duha ka fired cartridge cases sang cal. 45 pistol sa crime scene.
Una naman nga ginlantaw sang kapulisan ang posibilidad nga ang nagluthang ang kabahin sa naka-eskapo nga priso sa NODJ.
