Nakilala na ang miyembro sang New People’s Army nga napatay sa engkwentro batok sa 62nd Battalion sa Sitio Pitik-pitik, Barangay Luz, Guihulngan City, Negros Oriental kagab-i.
Suno kay Brigadier General Inocencio Pasaporte, commander sang 303rd Infantry Brigade, ang napatay amo si Randy Tapales, katapo sang Sandatahang Yunit Propaganda sang Central Negros One sa idalum sang Komiteng Rehiyon-Negros/Cebu/Bohol/Siquijor.
Si Tapales ang may kaso nga frustrated murder kag murder nga may kaangtanan sa pagpatay sa suldado nga si Corp. Mark Anthony Quiocson sa nasambit man nga barangay sang Hulyo 1, 2020.
Suno kay Pasaporte, narecover sa lugar sang engkwentro ang lawas sang biktima kag ang isa ka 357 revolver, isa ka cal. 45 pistol nga may magazine kag unod nga live ammunition kasubong man ang isa ka granada.
Ginpatsekyar man sini kun ang cal. 45 pistol ang nakarehistro sa gin-ambush nga si Quiocson, apang ini ang negatibo.
Madumduman nga nagasakay sadto ang suldado sa motorsiklo sang hinali nga gin-ambush ni Tapales kag sang iban pa sini nga kaupod sa NPA.
Sa karun ginahulat pa ang iban nga mga impormasyon natuhoy sa napatay nga NPA member kaangay nalang sa address sini.
