Ginpaathag sang pinuno sang Department of Social Services and Development (DSSD) sa syudad sang Bacolod ang rason kun ngaa may nakabatun sang 1st tranche sang Social Amelioration Program (SAP) nga wala makabaton sang 2nd tranche.
Madumduman nga nagpagwa sang alegasyon si Senator Manny Pacquiao nga may nadula gikan sa P10 billion nga ayuda para sa SAP kag wala makadangat sa mga benepisyaryo.
Suno kay Pacita Tero, ang nakabaton sang SAP sa Bacolod City sa 1st tranche ang yara sa 98,143, may masobra 10,100 naman nga benepisyaryo ang nakabatun sang ayuda gikan sa Pantawid kag may masobra 14,000 naman nga gincater nga left out.
Sa kabug-usan nagdangat na sa 139,000 ang nakabatun nga benepisyaryo sa syudad sang Bacolod.
Paathag ni Tero nga bangod indi pa tuman ka idid ang proseso sa paghatag sang 1st tranche, madamo gid ang nakabatun sang ayuda, apang may mga dugang nga proseso sa 2nd tranche.
Ginalantaw sini nga ang iban nga nakabaton sang 1st tranche ang wala na makabatun sang 2nd tranche bangod sa posibilidad nga natukiban nga indi elligible.
Paathag sini nga kun nalakip na sa miyembro sang pamilya sang isa nga nakakuha, indi naman ini mahatagan.
Suno kay Tero, pinaagi sa process of deletion kag process of deduplication, mahemo nga matumod kun may mga pangalan nga nalakip na sa household nga una na nakabatun kasubong man ang mga indibidwal nga nakabatun na sang ayuda gikan sa iban nga ahensya sang gobyerno kaangay sa Social Security System (SSS), Department of Labor and Employment (DOLE) kag Land Transportation Franchising Regulatory Board (LTFRB).
Ginpakigbahin man sini nga may iban nga mga indibidwal nga personal nga gin-uli ang nabatun nga SAP bangod nakabatun na ang mga ini sa ayuda gikan sa iban nga ahensya.
Ginpakigbahin man sini nga may ginpalagas pa nga kapin 4,000 para sa Bayanihan 2, agud nga makabatun ang mga nagapahayag nga wala pa makabaton.
Suno kay Tero, nagpahayag ang Department of Social Welfare and Development (DSWD) nga pabalikon sa mga barangay ang mga nagaclaim nga wala pa makabatun sa 1st kag 2nd tranches agud nga matsekyar sang gintalana nga officer sa barangay nga sarang makacounter check sang ila mga pangalan.
